Act 21 | ASO | STEP | Ido' engikisi maka' minunidoti' oteko hulo-ngedo vo sipiu' dizune'. Dizo vovo' vovo' ogo lisihe' ogo vo Ko ailani malo' hetelune. Hetelo ongo go' lavo gohi oto vo vo Lodo ailaniu' vo hetelo neloti' vo Patala ebeta hetelune.

Acts 21

Paulo' Zelusalemi Ebeta Volosa Sipiu' Dizo Vine' Gamazi

1 Ido' engikisi maka' minunidoti' oteko hulo-ngedo vo sipiu' dizune'. Dizo vovo' vovo' ogo lisihe' ogo vo Ko ailani malo' hetelune. Hetelo ongo go' lavo gohi oto vo vo Lodo ailaniu' vo hetelo neloti' vo Patala ebeta hetelune. 2 Vo hetelo sipi gohi ma vise' ogo Hoinikia misubouko volosa neine' sipi ma ningo a'mingu' dizo vune. 3 Guvo noso huko'mo vo Kipilo ailani ningo adavala neivo ivile' ogo Silia misubo gahevela Tilo ebeta hetelune. Nelo' sipiuti' heneni di nihulavo 4 laza sipiuti' lemo dizo Izesu' evenele zuho ma ningo inginesi ongo nonivo gamene seveni vine'. A'mine aleve nene O'moso'mi Sikalahuli'mo do ote-ngedavo Zelusalemi numudo' vamilive li Paulo'ni li-imani'. 5 Ne'mine likevo a'mido' nonivo volone' gamene alitavo a'midoti' alevesi ido' vene' izipaha'inesi lele'mizi numuno ebekuti' di heta i-lidikevo inginesi guvo noso gahevela mino obuvote hizo O'mosola lune. 6 O'mosola lo minunidoti' mo vilo likevo mo minilo lo-ngedo sipiu' dizo vokunivo ingine numu'nida tine' mili vani' ve.

7 Ne'mine ikevo laza gohi api' ogo Tilo ebe' hulo Tolemai ebeta vo hetelo nelo' Izesu' evenele zuhosi lopo'ni lapa'ni lo numuno hamo' engikisi ungune'. 8 Ongo go' lavo Tolemai ebe' hulo Kaesalea ebeta vo hetelo a'mine ebeto' Izesu' gamazi've lo-ngeme ngeme' oga' ive Hilipo'ni ningo ei' numu'veu' dizo minune. Aza nene gamene gala'muda vomine evene' seveni mono' gonolo' ngele'mize milanguti' minine'. 9 Ei' aluvo seta've seta've minani'. Velo' vami haza mini O'moso'mi Sikalahuli'mo lu'ningu' gono davo O'moso'mi gamazi li soto' i ngimi' ngimi' igi minaa' ani'. 10 A'mido' imine' molo nonivo O'moso'mi gamazi lo soto' oga' ive ma gulive Agabo' nene Zudaia misuboukoti' o lomo 11 nonida ogo hetelo Paulo' gopololo' izekine' inite' apaso asi've gizene analo' noizo ti' lo line': O'moso'mi Sikalahuli'mo ti' lo nolive. Mene initeli'mi meleho nene Zelusalemi ebeku' vo neivo a'mingu' Zuda vete uvoni' ne'mine igi nalava imi heta ato' veti a'ningu' ngimilisave. 12 Ne'mine lavo gelo lazasi ido' a'midoti' alevesi Paulo' aza Zelusalemi numuda dizo vamilive lo geli gelinga lo-imune'za 13 Paulo' aza ti' lo lo-limive: Lingine ive nama igi neni' lu'ne nene nanimu' di nigangi-nidave. Naza nene nalava nimilizave lo gelo ha volosa nouha ido' nevo' nomive. Guvelesi ve Izesu' eze zuho nouvonako Zelusalemi ebeta nibili hililizani' nesi gele nouvoni'za haza volosuve. 14 Ne'mine lavo laza nene ngelo ei' gamazilo' lamoso' ogavo elese' ogo mino ti' lo lune': Lamine' ve. Guvelesi ve line' gamazi ha soto' ilive.

Paulo' Aza Zakobo' Neida Vine' Gamazi

15 Ne'mine lo nonivo gamene ma ogo vavo Zelusalemi numuda volone lo initete do va'va' une' ve. 16 Do va'va' okunivo Kaesalea ebekuti' Izesu' evenele zuho linge malite lele'mizavo maka' vune. Vo hetelekunivo lele'mizi ave nete ve mali'mi numungu' lele'mizi milikevo dizo minune. A'mine ve nene Kipilo ve mino gamene gala'mudati' vomine Izesu' evenele minine' gulive Manaso'.

17 Zelusalemi numungu' hetelekunivo Izesu' zuho ngolize izi lopo'ni lani'. 18 Ongo go' lavo Paulo' aza Zakobo'ni vo ninge-delove lavo maka' vune. Numu'veu' vo nodizo ningune' nene mono' gizebo vesi Zakobolesi maka' nizani' neivo ningune. 19 Ningo ngopo'ni lo Paulo' aza heta ato' vetida eze gono do'mo nomonivo O'moso'mo inite' muki' ogo molo ine' ne'mi gamazi vetete' ogo osu' lo lo-ngimine'. 20 Lo-ngemavo gili nemu' O'moso opo'ni li Paulo'ni ti' li li-imani': Leze zuho make, gaza Zuda vetinguko Izesu' evenele zuho lili' igi vanu hizi tauseni ne'mine nizani' nene mo ningo gele nane. A'mine aleve muki' nene Mose' lo huko line' gamazi nene amuzo mili hizi ele' iga' nave. 21 Ne'mine ogavo evene' malite soza gamazi ti' li li-gidikevo gilaa' nave: Gaza Zuda ve haza heta ato' veti vovo'ningu' mini'mi moni nizave inginemu' nene Mose' lo huko line' gamazi nene gili hulilizave laa' ido' gipe'ine zuho oko'ine lolovo huki-ngidami Zuda veti monovo danavate muki' hulilizave lo lo-ngeme' ngeme' oga' nane likevo gilaa' nave. 22 Ti' li gili gei' omo nane li lilizani' nene gililisanako laza nadolone. 23 Nemu' laza gamazi ma lo-ngemeso' nene ilinize. Lelita ve seta've seta've nizani' ingine O'moso'mi gulivelo' li mili li huki godo'ine zopovo hukami haza nizanako 24 gaza vo engita gi'mizo leze Zuda veti monovo di engikisi okodine lutine O'moso'mi velelo' lamine' ilive li di lamine' ilo. Ne'mine ikevo O'moso gizi imilizani' inite' meni hize-ngedanivo gizi vata' niigi godo'ine zopovo huki matava ili di hulilizave. Ne'mine ikevo mukilite ningi geikumu' lani' nene hazamu' soza gamazi li-gidi lani' nene gililisave. Ido' Mose' lo huko line' gamazi nene gazasi gele daa' naine' nesi gililisave. 25 Ido' heta ato' ve Izesu'nimu' gili ele'vole' igi nizavemu' nene gozopo' luhuvo nite' gizo hulune' nene lo hukune' gamazi nene ti' lo gizune' ma neive: Avazaha o'moso niteliti noso' nitekuti' nami ize guloliti vanise'ine nami ido' nala' i-ngidikevo hilani' ize guloti' nami vene' vemoho' ido' alungo umungive gopo ingamilo lo lo huko-ngidune' ma neive. 26 Ne'mine likevo ingi go' lavo Paulo' aza gamazi'ine gelo vo a'mine lani' ve seta've seta'vela gi'mizavo engikisi oko'ine lu'ine di lamine' i'mi vi minani'. Ne'mine igi nizavo Paulo' aza Zuda veti mono' numuno nabau' dizo ingine hamo' hamokumu' O'moso inite' gizi imilizani' gamene ado' oko'ine lu'ine di lamine' igi minilizani' gamene nene osu' liline' gamenemu' nene a'mine gonolo' gizebo ve lo-ngimine'.

Paulo' Aza Mono' Numungu' Neivo Analo' Di Gili' Lani' Gamazi

27 Lo-ngemavo oko'ine lu'ine di lamine' igi minilizani' gamene seveni nene osu' lolosa neivo Paulo' aza mono' numungu' neivo Asia misuboukoti' Zuda ve linge ma eze ningi evene' muki' mulu'ningu' hizi analo' di gili' li 28 geke' geke' li ti' li lani': Isilaele' vekizo, alevo. Maka' dalone. A'mine ve mene numudo' namado' mono leze Zuda ve do leme-ledo Mose' lo huko-lidine' gamazisi ido' mono' numuno mesi dovo ledevo' ogo evene' muki' lo-ngeme ngeme' oga' ive ma ne neive. Ido' nGiliki aleve ngele'mizo a'mingu' dizidi'mo nesi mono' numudeu' mene do goloso ogave li lani'. 29 Eheso ve ma gulive Tolohimo' aza Paulokisi Zelusalemi tauniu' nizasivo ningi ingine nene Paulo' ele'mizo mono' numuno nabau' dizihe li nemu' gamazi lani'. 30 Ne'mine li likevo a'mine ebe' me'ninge muki' gili loti' izi igi di gese' igi Paulo'ni mono' numuno nabauti' gelelehe' igi di heta ani'. Di heta ikevo geti akahe gizani'. 31 Ne'mine igi Paulo'ni bili hililisa navo Zelusalemi aleve muki' gulugulu li lovo gamazi nilave li gamazi hulikevo Loma veti amiliti guve'inesi ve naba neida nene vavo 32 aza gelo amisi ido' engi' gizebo ve'ine linge masi ngele'mizivo loti' izi limi geti vi nizada hetelikevo guve'inesi vesi amisi ningi Paulo'ni bililisa ani' nene alami hulani'. 33 Hulikevo amiliti guve'inesi ve naba aza hetelo Paulo'ni do goni' ilive lo seni nala' setatunu' izilisave lo lo-ngidine'. Lo-ngedo ti' lo line': A'mine ve nene zaho neve. Ido' inite' nanite' do goloso ive lo longo' o-ngidine'. 34 Ne'mine ogavo evene' ingine ato ato' gamazi li gulugulunga li minadi'mo gamazi monovo gele guno amiline' ogavo amiliti numunguko di dizilizave lo lo-ngidine'. 35 Lo-ngedavo ele'mizi vi numuno gateda akalo' ele'mizi dizilisa navo evene' ingine nge'meti vi gani mangilise i'mi vi ti' li lani': Mene ve nene osu' lilive. Ne'mine lisa Paulo'ni bili hililisa avo amilite a'ine avilelo' zalo' mili di vani'.

Paulo' Aza Monovo've Lo-ngemelesa Line' Gamazi

37 Amiliti numungu' ele'mizi dizilisa navo Paulo' aza nene nGiliki gamaziuti' amiliti guve'inesi ve naba longo' o-do line': Naza gamazi ma lo-gemeloho. Lo lavo aza ti' lo line': Gaza nGiliki gamazi gele nabe. 38 Gozopo' ngamani lovo o ngemo lovo ekese' iga' ave gulo hadene ne'mine fo tauseni (4,000) ngele'mizo ebe' hadivela vo minive Aigita ve nene gei' nolosane lo giluvoni'za nGiliki gamazi lainako ato' ve nolosane. Olo. 39 Lavo ti' lo line': Naza nene Zuda ve Kilikia misuboukoti' Taliso ebeta gidani' nouve. Naza a'mine guvelesi neine' tauni naba'mi me'ninge minanguti' nene nouve. Gaza gele nemanivo evene' mene gamazi ngomo ma lo-ngemelohe. 40 Ne'mine lavo amiliti guve'inesi ve aza gele emavo Paulo' numuno akalo' ote mino ana do oto avazaha ogo elese' ikilo lavo gamazi lami ve'ine biziki nizavo Zuda ve mukikumu' Hebilaio' ve laa' ani' engi' gamaziuti' ti' lo lo-ngimine':